Balooghat Ko Pohanchne Wali Larkion Ki Ghizai Zaroriyat

Larkiyon ke liye mutwazan ghiza bachpan, balooghat aur balooghat ke bad tak bhi bohat eham hoti hain . Lekin hamary muashary mein aam tor per larkiyon ki ghizai zaroriyat pori karne mein bachpan se he kotahi ki jati hai. Jis ki wajah se baloghaat ke marhaly tak pohnchtay larkiyan kamzori aur deegar kai masail ka shikaar ho jati hain. 

Zindagi ke ek makhsoos hissay tak har mah mahwari ki waja se larkiyan aur aurtain iron yani foulad ki kami ka shikar ho jati hain jis se baad azaan mahwaari aur azdawaji zindagi mein pechidagiyan paida hoti hain.

Mustaqbil mein hony waly masail se bachne ke liye larkiyon ki ghizai zaroriyaat khas tor per foulad ki ehmiyat ka khayal rakha jaye. Is ke liye zaroori hai ke unki khorak mein aese ghizayi ajza shamil hon jin mein foulad ziada paya jata hai. 

Jisam mein foulad ki tarsail barqarar rakhne ke liye, gaaye ka gosht, bakry ka gosht, qeema, murghi ka gosht, machli, kalaiji aur dil waghera khorak mein istemal karna chahiye. Agar koi gaye ka gosht nahi kha sakta to do teen dalon ko mila kar kha le us se bhi gosht jitna foulad hasil hota hai.

Issi tarah mukhtalif sabziyan jaisy ke karaily, bangen, maithi, paalak, saag aur harry paty wali sabziyon mein foulad khasi miqdar mein moujod hota hai.Phalon mein saib, amrood, aaro, tarbooz, bair, singharra, aur khajoor mein foulad ki kafi miqdar hoti hai jo jisam mein foulad ki kami ko pora kar sakti hai. Mazeed ye ke agar aap ko kisi kism ki allergy nahi hai to aap ko har tarah ka mousami phal khana chahiye.

Khush mewa jaat bhi foulad hasil karne ka eham zarriya hain. Khushk phaloon mein badaam, kishmish, moong phali, akhrot aur til mein foulad bohat ziada miqdar mein paya jata hai.

Foulad ko khoon mein jazab hony ke liye vitamin C darkar hota hai. Iss liye agar jisam mein vitamin C ki kami hai to foulad khorak mein moujod hony ke bawajood khon mein jazab nahi hota jis se jisam mein foulad ki kami barqarar rahti hai. Vitamin C tamatar, hari mirch, lemoon, palak, phool gobhi, moli, aalo, band gobhi, sabz payaz, kinno, malta, chakotra aur aam mein kafi miqdar mein paya jata hai is liye in sabziyon aur phalon ko ghiza mein lazmi shamil karen.

Foulad aur vitamin C ke ilawa deegar ghizayi ajza bhi bohat ehmiyat rakhty hai. Is liye balooghat ko pohnchany wali larkiyon ko apni ghizai zaroraiyat ka khas khayal rakhna chahiye. Aik mukamal aur mutwazan ghiza ka istemal he larikyon mein balooghat mein any wali tabdeeliyon se nimatnay mein madad gar sabit hone ke sath sath aik sehat mand zindagi ka zamin hota hai.