Bachon Mein ADHD ki Shanakht Karein

Bachon ka kaam par tawajah barqarar na rakh pana. Ek hi ghalti ko baar baar dohrana. Bholna ya baar baar cheezain guma dena. Zaroorat se ziada aur ghair zaroori baatain karna. Musalsal jismani harkaat mein masroof rehna jese hatho ko hilana, pau zameen par marna waghera, ADHD Attention Deficit Hyper-Activity Disorder ki alamat ho sakti hain jo Pakistan bhar mein 2.94 feesad bachon ko asarandaz karta hai. 

Amoman ADHD ki alamat 3 saal ki umar mein zahir hona shuru ho jati hain. Aye jante hain ke aap apne bachon mein ADHD ki barwaqt shanakht kese kar sakte hain.

• Amoman 5 se 6 saal ke bachon ka attention span yani kisi cheez ki taraf matawajah rehne ki muddat kam az kam 15 minute hoti hai jab ke iss ke bar aks ADHD ke shikar bachay 8 se 12 seconds se ziada apni tawajah barqarar nahi rakh pate.
• Be-parwahi, yani baar baar bataye janay par bhi ek hi ghalti dohrana.
• Batayi gai hidayat par amal na kar pana.
• Ek task se foran dusray task ko karna shuru kar dena, maslan English ka kaam karte karte Maths ka kaam shuru kar dena
• Ghair zaroori jismani harkaat aur apne jism ko musalsal harkat mein rakhna
• Ek jaga par sakit baithne mein dushwari hona
• Ghair zaroori aur bohat ziada baatain karna
• Apni bari ka intezar na kar pana
• Soche smjhe baghair kaam karna 
• Khatray ko mehsoos na kar pana

Dosto, yeh alamaat bachay ki samaji zindagi mein masail ka bais ban sakti hai jese school ka kaam na kar pana, dost banane mein mushkil pesh ana waghera. Barwaqt tashkhees inn alamaat ki shiddat ko badtar hone se rok sakti hai. Bachon mein inn alamaat ke zahir hote hi child psychologist se zaroor ruju karein.