Bachpan Ke Buray Waqiyat Ke Anay Wali Zindagi Par Asraat

Waldain ka kam umari mein bachon pe tarbiyat ke naam par zehni aur jismani tashadud. Asatza ki bachon par ghair zaroori sakhti. Qareebi rishtedar ya ghairon ka jinsi tour se harasa karna. School mein sathi dosto ka marna, dhamkana, ya bully karna, yeh tamam buray waqiat ek zehni sadmay ki shakal mein aap ki anay wali zindagi ke har pehlu par manfi asrat maratab kar sakte hain. Aye jante hain ke bachpan mein tashadud ke waqiyat agay ja ker kin masail ka bais ban sakte hain.

• Re-victimisation, yani tashadud ka baar baar shikar hona. Tehqeeqat ke mutabiq 72% khawateen jinhon ne bachpan mein jismani, jinsi ya jazbati tashadud ka samna kiya ho, wo jawani mein bhi tashadud ka shikar hoti hain, kyun ke aysi khwateen khud-itimadi ki kami ke sath sath tashadud ke istemal ko tanaaziyaat se nimatnay ka ek aam rad-e-amal samajhne lagti hain.  
• Bachpan mein tashadud ka samna karne wale afrad mein baqiyon ki nisbat jismani sehat ke masail ka bhi samna karne ke imkan ziada hote hain jese ke diabetes, maiday ke masail, sar dard, aur arthritis se le kar dil ki bimariyan, heart attack, cancer, aur falij tak.
• Tashadud bachon ke liye ek aysa psychological trauma hai jo unn ki nafsiyati sehat ko tabahkun masail jese depression, anxiety, post traumatic stress disorder, obsessive compulsive disorder, eating disorders, mood disorders se le kar dissociative personality disorder ki hadh tak le jata hai. 
• Iss ke alawa tehqeeqat ke mutabiq self-harm ya suicidal behavior rakhne wale 12 feesad  afraad bachpan mein tashadud ka shikar hote hain. Jab ke eating disorders ya obesity ke shikar afraad mein se 5% ne bachpan mein tashadud ka samna kiya hota hai. 

Dosto, agar bar-waqt elaj na kiya jaye tou nafsiyati sadma tashadud ke shikar afraad ki zindagi tabah kar sakta hai. Umeed hai ke aap yeh maloomat apne dosto ke sath zaroor share karein gy ta kay anay wali naslou ko tashadud ki tabahkun nataij se bachaya ja saky.