Mood pe qabu na rakh panay ki nafsiyati bemari

Kya aap ke mood mein bohat taizi se utar charhao aata hai? Kya aap ka mood pal bhar mein intehai khushgawar se intehai afsurda ho jata hai? Kya aap ek lamhay intehai pur josh aur zaroorat se ziada khud itemad hote hain? Lekin agale hi lamhay aap apne aap ko be-bas, bekar aur na-umeed samjhte hain? Dosto! Kya aap jante hain ke yeh alamat ek zehni bimari Bipolar II disorder ki bhi ho sakti hain? 

Bipolar II disorder, 2 intehayi mutazad moods ka naam hai jo ke mard hazrat  ki nisbat khwateen mein ziada aam hai. Inn donon mutazad moods mein se ek Depression yani ghair zaoori afurdagi aur na-umeedi mehsoos karna jab ke dusri inteha Hypomania ki hai. Hypomania ek aisi halat ka naam hai jis mein insan mamool aur zaroorat se ziada khush, pur josh aur active hota hai. 

Ummoman Depression aur Hypomania ki alamaat ki muddat aur shiddat mein waqtan fa waqtan tabdeeliyan runuma hoti rehti hain. Lekin aksar aukat hypomania ki alamat, depression ki alamat ke sath hi ya foran baad zahir hona shuru ho jati hain. Jab ke kabhi kabhar hypomania ki alamat taweel ho jati hain aur uss ke baad depression ki alamat zahir hona shuru hoti hain taham depression ki alamat ziada numaya rehti hain. 

Hypomania ki chand eham alamat mein:

• Khud itimadi ka mamool se aur zaroorat se ziada hona
• Samaji mail jol mein zaroorat se ziada shamil hona 
• Khayalat mein taizi se tabdeeli ana
• Jismani sargarmiyon mein ghair mamooli izafa hone ke alawa 
• Chirchirapan aur mamool se ziada aur bohat taiz bolna shamil hain.

 Jab ke iss ki dusri inteha depression hai ki alamat mein:

• Uddasi, aur na umeedi mehsoos karna
• Motivation ka na hona
• Har tarha ki sargarmiyon mein dilchaspi ka fuqdan 
• Wazan mein achanak kami ya izafa hona
• Apne aap ko be-bas aur baykar samajhna aur
• Khudkushi ke khayalat ka ana shamil hain

Yeh alamat ammoman jawani ke ibtedayi saalon mein zahir hoti hain lekin yeh bemari bachon aur nau-umar afrad ko bhi ho sakti hai. Dosto, batayi gayi alamat ka musalsal dou hafton tak rehna khatarnak hai lehaza inn alamat ke zahir hote hi mahir e nafsiyat se ruju karein.