Endometriosis Banjhpan ki bari waja

Dosto kia aap ko maloom hai ke 30-50% khawateen mein Endometriosis banjhpan ka bais bhi banti hai, is liye is bemari ki waja se hony wali paichidagiyon ko samajhna bohat zarori hai ta ke aap samajh saken ke Endometriosis kis tarah banjh pan ka bais banti hai.

Pehle jantay hein ke Endometriosis kia hota hai? Is bimari mein uterus yani bacha dani ke andar banany wali layer jissay endometrium kehtay hein, iski berooni satah pe bhi banany lagti hai jo baad mein cysts yani thailion ki shakal ikhteyar kar leti hai aur taklif aur banjh pan ka bais ban sakti hai. 

Dosto! Endometriosis ki kuch alamaat hoti hain jin pe ghor kar ke aap is bemari ka barwaqt ilaj karwa sakti hain. 

• Endometriosis ki alamat mein haiz ke douran kamar aur pait ke nichly hisay mein dard, pakhany ya paishab ke douran taklif, haiz ke douran bohat ziada dard ya khon ana ya phir, qabz ya qay ana aur banjhpan shamil hain.
   
• Endometriosis sharoni yani kamar ke nechy ki hadiyon mein bigar ya phir soojan ka bais banti hai jis se hadiyan aapas mein jurny lagti hain aur khawateen mein hamal ke theharny mein paichidagiyon ki waja se banjh pan zahir ho sakta hai.
   
• Is ke ilawa Endometriosis se fallopian tube yani baiza dani mein soojan ya zakham banany lagty hain jis se aurat ka anday banany ka amal mutasir hota hai jo ke banjpan ka sabab ban sakta hai.
   
• Endometriosis se jisam mein hormones ki miqdar aur mayar mein tabdeeliyan ati hain jo ke andon ke meyar aur quwat e madafat ko mutasir karta hai. Ye paichidagiyan banjhpan ka bais ban sakti  hain.
   
• Endometriosis bacha dani mein gher mamoli khichao ka bais bhi banti hai ye khichao endometrial layer ko haiz ke douran bacha dani se alag karta hai lekin khichao ziada hony ki waja se hamal theharna mushkil ho jata hai aur khawateen mein banjhpan namo dar hota hai.

Endometriosis aik paicheda bimari hai is liye is ka bar wqat elaaj bhi zaroori hai. Mamooli alamat ki soorat mein, dawai aur behtar tarz e zindagi se ilaj mumkin hai ta hum paicheda alamat ki surat mein surgery bhi karna par sakti hai aur aik lamby arsy ke liye tarz e zindagi ki mansoba bandi ki jati hai.

Umeed karti hon article sun kar aap ki malomat mein izafa hua hai aur aap in malomat se mustafeed ho kar apni sehat mand zindagi ke liye behtar iqdamat kar saken gi. Mazid malomat ke liye articles sunty rahen, Mujhe ijazat dein.