App Wazan Kam Kartay Kartay Zehni Bemari Ka Shikar Tau Nahi Ho Gaye?

By:Zoya

Dosto, weight lose karna yaqeenan ek mushkil safar hony ke sath sath apne aap pe qabu paane ki ek mushkil mashaq bhi hai.  Aap ye baat sun ke hairan hon gay ke Anorexia Nervosa jesi zehni bemari ka aghaz bhi apnay wazan ko ghatanay ya apne eating pattern ko change karne se shuru hota hai. 

Anorexia Nervosa, ek aysi zehni kafiat hai jo ke sarasar ghair maqool darr pe mabni hai aur wo darr hai “wazan ka barh jana”.  Aysy log underweight yani kam wazan honay ke bawajood wazan bharne ke iss ghair maqool darr se iss hadh tak do char rehte hain ke woh kisi bhi qisam ki ghiza ko apne liye nuqsan deh samajhte hain. 

Underweight hone ke bawjood inhein apna aap mota lagta hai aur woh har waqt apna weight kam karne ke nit naaye tareeqay sochte rehte hain.

Aiye ab Anorexia Nervosa ki kuch alamat ke baray mein jantay hain:

Ub sawal yeh paida hota hai ke kya depression anorexia nervosa ki ek wajah hai? Tou dosto, ek tehqeeq ke mutabiq tareeban 94% khawateen jo ke anorexia nervosa ki patient thi un mein unipolar depression ke symptoms paye gaye.

Kuch tehqeeq ke mutabiq depression, eating disorders jese Anorexia nervosa ki ek bari waja ho sakta hai. Jab ke kuch researchers ka yeh manna hai ke Anorexia nervosa aur iss se milte julte eating disorders depression ki ek baari wajah bante hain. 

Dosto, depression aur anorexia nervosa, ek sath bhi exist ker saktay hain jo ke ek khatarnak baat hai. Researches ye batati hain ke anorexia nervosa ke patients mein khudkushi ke rujhanat 50% ziada hote hain jab ke iske alawa bhi un mein depression ki bohat si alamat payi jati hain jese neend ka na ana, thakawat mehsoos kerna, na-umeedi, aur bebasi waghera. 

Aysi halat mein ghar pe totkay karne ki bajaye mahir e nafsiyat ke pass janay se bilqul na katraen. Anorexia Nervosa ek sangeen zehni bemari hai jis ka ilaj zaroori hai. Aur iss ka ilaj sirf psychotherapy aur Psychiatrist ki batayi gae medicines se hi mumkin hai. 

Toh, apne ird gird logo ka khayal rakhe aur un mein hone wali choti se choti tabdeeli ko note karein.

Allah Hafiz!



Back to List